حوزہ نیوز ایجنسی کے مطابق، سربراہ مجلس وحدت مسلمین پاکستان سینیٹر علامہ راجہ ناصر عباس جعفری کی اپیل پر سید حسن نصراللہ کی اسرائیلی حملے میں عظیم شہادت کے خلاف آج ملک بھر میں احتجاج کا اعلان کیا گیا ہے۔ احتجاجی مظاہروں میں ملک بھر کی تمام سیاسی و دینی جماعتوں کے دینی غیرت وحمیت سے سرشار رہنما اور کارکنان شریک ہوں گے۔
اسرائیلی جارحیت اور امریکی پشت پناہی کے خلاف ملک کے چاروں صوبوں اور گلگت بلتستان سمیت آزاد کشمیر میں بھی احتجاجی اجتماعات ہونگے۔
ایم ڈبلیو ایم کے تحت صوبائی دارلحکومتوں سمیت ملک بھر کے تمام چھوٹے بڑے شہروں میں احتجاجی مظاہرے، ریلیاں اور اجتماعات ہونگے۔
ملک کے بڑے شہروں کراچی، لاہور اور اسلام آباد میں احتجاجی مظاہرے اور ریلیاں امریکی سفارت خانے کے سامنے ہوں گے۔
گلگت بلستان کے غیور عوام نے آج سید حسن نصراللہ کی المناک شہادت پر بڑے پیمانے پر اجتماعات اور مکمل شٹر ڈاؤن کرنے کا اعلان کیا ہے۔
ملک بھر کی طرح وفاقی دارلحکومت اسلام آباد میں بھی آبپارہ چوک سے امریکی سفارت خانے تک احتجاجی مارچ کیا جائے گا۔
کراچی میں احتجاجی ریلی کا انعقاد نمائش چورنگی سے امریکی قونصلیٹ تک ہو گا۔
لاہور میں سہ پہر 3 بجے اسمبلی ہال تا امریکی قونصلیٹ تک احتجاجی ریلی نکالی جائے گی۔
